გორკის სახელობის კინოსტუდია

„მაქსიმ გორკის სახელობის საბავშვო და ახალგაზრდული ფილმების კინოსტუდია“

ტიპი	სააქციო საზოგადოება
დარგი	კინემატოგრაფი
დაფუძნდა	1915
სათავო ოფისი	მოსკოვი, რუსეთი
პროდუქცია	ფილმები, დოკუმენტური, ანიმაციური
მფლობელი	მოსკოვის ხელისუფლება
სერვისის ენა	რუსული
საიტი	gorkyfilm.ru

სააქციო საზოგადოება „მაქსიმ გორკის სახელობის საბავშვო და ახალგაზრდული ფილმების კინოსტუდია“ (რუს. Акционерное общество «Киностудия детских и юношеских фильмов имени Максима Горького») — საბჭოთა და რუსული კინოწარმოების კომპანია (სააქციო საზოგადოება).

კინოსტუდია დაარსდა 1915 წელს რუსეთის იმპერიაში, როგორც კინოატელიე „Русь“. ერთ-ერთი უძველესი კინოკომპანიაა რუსეთში, მეორე უძველესი „ლენფილმის“ შემდეგ. თავისი არსებობის განმავლობაში კინოსტუდიამ გადაიღო ათასზე მეტი მხატვრული ფილმი და სერიალი.

ისტორია

1915 წლიდან — კინოსტუდია „Русь“ (შექმნილი კოსტრომელი ვაჭარ-ძველმორწმუნე მიხაილ ტროფიმოვის მიერ, რეგულარული ფილმის წარმოება დაიწყო 1916 წელს). 1924 წლიდან — „Межрабпом-Русь“ (ორგანიზაცია „საერთაშორისო მშრომელთა დახმარების“ კინემატოგრაფიული ორგანო - „მეჟრაბპომი“). 1928 წლიდან — „მეჟრაბპომფილმი“. 1936 წლიდან - „სოიუზდეტფილმი“. 1948 წლიდან — მოსკოვის მ. გორკის სახელობის კინოსტუდია. 1963 წლიდან - მ. გორკის სახელობის საბავშვო და ახალგაზრდული ფილმების ცენტრალური კინოსტუდია.

სხვადასხვა დროს მუშაობდნენ ისეთი ცნობილი რეჟისორები, როგორებიც არიან: იაკობ პროტაზანოვი, ისიდორ ანენსკი, ალექსანდრე როუ, სერგეი იუტკევიჩი, მარკ დონსკოი, ლევ კულეშოვი, ლეონიდ ლუკოვი, მარლენ ხუციევი, სერგეი გერასიმოვი, სტანისლავ როსტოცკი, ვასილი შუკშინი, რიჩარდ ვიქტოროვი, ბენიამინ დორმანი, მარკ ოსეპიანი და სხვები.

1967 წელს კინოსტუდია დაჯილდოვდა შრომის წითელი დროშის ორდენით და ცნობილი გახდა, როგორც „შრომის წითელი დროშის ორდენოსანი მ. გორკის სახელობის საბავშვო და ახალგაზრდული ფილმების ცენტრალური კინოსტუდია".

1974 წელს დაჯილდოვდა ოქტომბრის რევოლუციის ორდენით და ცნობილი გახდა, როგორც „ოქტომბრის რევოლუციისა და შრომის წითელი დროშის ორდენოსანი მ. გორკის სახელობის საბავშვო და ახალგაზრდული ფილმების ცენტრალური კინოსტუდია“.

2003 წლის 4 დეკემბერს დაარსდა კინოსტუდია, რომელმაც მიიღო ახალი სახელი — ღია სააქციო საზოგადოება შემოქმედებითი და საწარმოო ასოციაცია „მ. გორკის სახელობის საბავშვო და ახალგაზრდული ფილმების ცენტრალური კინოსტუდია“.

2015 წლიდან კინოსტუდიაში შედის ფილიალები: პოპულარული სამეცნიერო და საგანმანათლებლო ფილმების ცენტრალური სტუდია - „ცენტრნაუჩფილმი“, სამეცნიერო კვლევითი კინო-ფოტო ინსტიტუტი „ლენნაუჩფილმი“.

2015 წელს, ასი წლისთავთან დაკავშირებით, მის ტერიტორიაზე „ვარსკვლავების ხეივანის“ პირველი მემორიალები გაიხნა.

2018 წლის აპრილში კინოსტუდიის შვიდი შენობის გაყიდვა გამოცხადდა. აუქციონზე გაიყიდა ასევე მიწის ნაკვეთები და ავტოსაწყობი, 8693 კვადრატული მეტრი საერთო ფართობით.

2019 წლის ოქტომბერში კინოსტუდიის გენერალური დირექტორის თანამდებობაზე დაინიშნა კინოსტუდია „სოიუზმულტფილმის“ გამგეობის თავმჯდომარე იულიანა სლაშჩევა.

2020 წლის შემდეგ

კინოსტუდიამ რუსეთის ფედერაციის კულტურის სამინისტროს მხარდაჭერით გამოუშვა რამდენიმე მხატვრული ფილმი: რომანტიკული კომედია „სიყვარული ზომების გარეშე“, თინეიჯერული დრამები „ციცინათელები“ და „მე თავისუფალი ვარ“.

კინოსტუდია ინვესტორების მისაზიდად ატარებს პრეზენტაციებს დოკუმენტური კინორეჟისორებისთვის Gorky.Doc პროექტის ფარგლებში; ყოველწლიური გამოფენა-კონკურსებს მხატვრული ფილმების სცენარისტებისთვის; კინოფესტივალებს, ინდუსტრიულ კონფერენციებსა და გამოფენებს. კინოსტუდია ასევე არის საერთაშორისო პოპულარული სამეცნიერო ფილმების ფესტივალის - „ცოდნის სამყაროს“ ოფიციალური ორგანიზატორი, რომელიც ყოველწლიურად იმართება სანქტ-პეტერბურგში.

2020 წელს კინოსტუდიის ორგანიზებით, რუსეთის ფედერაციის კულტურის სამინისტროს მხარდაჭერითა და მოსკოვის საპროდიუსერო ცენტრის მონაწილეობით, ჩატარდა პირველი ყოველწლიური ფესტივალი კინომუსიკაში „საუნდტრეკი“.

2021 წლის მაისში, ღია აუქციონზე გაიყიდა უძრავი ქონების კომპლექსი, რომლის საერთო ფართი 17,4 ათასი მ² იყო სანქტ-პეტერბურგში, მელნიჩნაიას ქუჩაზე, სადაც ადრე მდებარეობდა „ლენნაუჩფილმის“ ფილიალი.

2021 წლის 1 ივნისს КиноПоиск HD პლატფორმაზე შედგა პრემიერა Yandex-თან ერთობლივად წარმოებული სერიალისა - „მინდა ყველაფერი ვიცოდე!“. სერიალი გახდა საბჭოთა და რუსული იგივე დასახელების პოპულარული კინოჟურნალის (რომლის პროდიუსერიც „ცენტრნაუხფილმი“ იყო) თანამედროვე ვერსია. სიმღერა თავხატულასთვის დაწერა და შეასრულა მომღერალმა მონეტოჩკამ.

2021 წელს, განვითარებისა და წარმოების სხვადასხვა ეტაპზე შეიქმნა 15 ახალი მხატვრული ფილმი, 40 დოკუმენტური და სამეცნიერო-პოპულარული პროექტი.

2021 წლის ნოემბერში, რუსეთის ფედერაციის მთავრობამ განკარგულებით კინოსტუდიებისთვის ძველი პავილიონების რეკონსტრუქციისთვის, ახალი ობიექტების მშენებლობისთვის და ახალი აღჭურვილობით უზრუნველსაყოფად 1,1 მილიარდ რუბლზე მეტი გამოიყო. მოდერნიზაციის დასრულების ვადად 2026 წელი განისაზღვრა.

2023 წლის ივნისში რუსეთის პრეზიდენტმა ვლადიმერ პუტინმა ხელი მოაწერა განკარგულებას კინოსტუდიის ქალაქ მოსკოვის საკუთრებაში გადაცემის შესახებ.

მფლობელები და მენეჯმენტი

2023 წლის დეკემბრის მონაცემებით კინოსტუდიის 100 % ეკუთვნის მოსკოვის მთავრობას. დირექტორთა საბჭოს თავმჯდომარეა დიმიტრი პრისტანსკოვი. გენერალური დირექტორი - იულიანა სლაშჩევა.

მუზეუმი

წლების განმავლობაში კინოსტუდიაში, პერსონაჟებზე მუშაობის პერიოდში, ჩამოყალიბდა ერთ-ერთი მდიდარი კოსტუმირებული სამუზეუმო ფონდი. დამთვალიერებლებს შესაძლებლობა აქვთ შეიტყონ, როგორ იქმნებოდა და რა ხრიკებს მიმართავდნენ კოსტიუმის მხატვრები პერსონაჟთა იმიჯის შესაქმნელად. აქ შესაძლებელია კინოსტუდიის ყველაზე ცნობილი ფილმების შექმნის ისტორიების გაცნობა („მოროზკო“, „გაზაფხულის ჩვიდმეტი გაელვება“, „ოფიცრები“ და სხვა). ასევე შეიძლება ლეგენდარული კონოსტუდიის დერეფნებისა და პავილიონების დათვალიერება და იმ კინოტექნიკის ნახვა, რომლითაც იქმნებოდა საბჭოთა კინემატოგრაფის აღიარებული შედევრები.

ერალაში

„ერალაში“ (რუს. «Ерала́ш») — საბჭოთა და რუსული საბავშვო იუმორისტული კინოჟურნალია, რომელიც 1974 წლიდან გამოდის მ. გორკის სახელობის საბავშვო და ახალგაზრდული ფილმების ცენტრალურ კინოსტუდიაში. თავიდან მისი ჩვენება კინოთეატრებში, შემდეგ კი ტელევიზიაში ხდებოდა. ჟურნალის მხატვრული ხელმძღვანელია ბორის გრაჩევსკი. 1996 წლიდან კინოჟურნალის წარმოება უკვე საკუთარ კინოსტუდიაში მიმდინარეობს („ერალაშ-ლენდი“ (1996-2005), კინოსტუდია „ერალაში“ (2005 წლიდან დღემდე)), რომელიც არსებობს მ. გორკის სახელობის კინოსტუდიასთან. პირველი გამოშვება სამი მინიატურისგან შედგებოდა. პირველი სიუჟეტი იყო მინიატურა „სამარცხვინო ლაქა“ ა. ბარნოს სცენარის მიხედვით. შემდეგ ყოველწლიურად 6 გამოშვება იწარმოებოდა. 2010 წლიდან წელიწადში გამოდის არაუმცირეს 10 სერიისა.

სხვა აქტივობები

ძირითადი საქმიანობაა კინოწარმოება, ასევე კინო და სატელევიზიო პროექტების შექმნის მომსახურების სრული სპექტრი. ლოკაციისა და ინტერიერის გადაღების ორგანიზება; ფილმის გახმოვანება; კოსტიუმების სამკერვალო და გაქირავება; დეკორაციის მშენებლობა.

ბოლო წლებში კინოსტუდიის შემოსავლის ერთ-ერთი მთავარი წყარო იყო შენობების გაქირავება. ბუღალტრული აღრიცხვის რუსული სტანდარტების მიხედვით 2018 წელს კინოსტუდიის შემოსავალმა შეადგინა 423 მილიონი რუბლი. (+5 % 2017 წელთან შედარებით), წმინდა მოგება - 29 მილიონი რუბლი.(+13 %)

ფილმოგრაფია

იხილეთ: მ. გორკის სახელობის კინოსტუდიის ფილმების სია

კინოსტუდიის დირექტორები

• ელენა ნეფედოვა (1948-1955)
• გრიგორი ბრიტიკოვი (1955-1978)
• ევგენი კოტოვი (1978-1987)
• ალექსანდრე რიბინი (1987-1995)
• სერგეი ლივნევი (1995-1998)
• ვლადიმერ გრამატიკოვი (1998-2002)
• სტანისლავ ერშოვი (2003-2010)
• სერგეი ზერნოვი (2010-2019)
• იულიანა სლაშჩევა (2019 წლიდან)

რეკორდსმენი ფილმები

• ისიდორ ანენსკის „ანა კისერზე“ (1954) - 31 900 000 მაყურებელი.
• სერგეი გერასიმოვის „წყნარი დონი“ (1957) - 47 000 000 მაყურებელი.
• სტანისლავ როსტოცკის „ორშაბათიც გათენდება“ (1968) - 31 000 000 მაყურებელი.
• ვლადიმერ როგოვოის „ოფიცრები“ (1971) - 53,400,000 მაყურებელი.
• სტანისლავ როსტოცკის „განთიადი კი აქ მშვიდია“ (1973) - 66,000,000 მაყურებელი.
• ბორის დუროვის „XX საუკუნის მეკობრეები“ (1979) - 98,000,000 მაყურებელი.

რესურსები ინტერნეტში

• შეგიძლიათ იხილოთ მედიაფაილები თემაზე „გორკის სახელობის კინოსტუდია“ ვიკისაწყობში.
• ოფიციალური საიტი
• კინოსტუდიის გვერდი ВКонтакте-ზე
• კინოსტუდიის გვერდი Telegram-ზე